[东方报]歐國外：惡客烏克蘭反轉波斯尼亞[03-21]

十七号

歐國外附加賽B組，波斯尼亞主場迎戰烏克蘭。烏克蘭世界排名24位，比71位嘅波斯尼亞高一截，近況同狀態更係遠勝對手，而且佢哋近年受戰爭影響，早已習慣離開主場比賽，波斯尼亞近5場1勝4負，近況差勁，主場對佢哋幫助不大，烏克蘭客勝睇高一線。（周五凌晨3時45分開賽）

英超兵孭飛攻守兼備
波斯尼亞喺歐國外J組僅排第5，取得10戰3勝7負，減去兩場對「魚腩」列支敦士登勝仗唔計，實際上對同組其他球隊賽事，就只係贏過冰島1場咁大把，整個外圍賽狂失20球，更過分嘅係去年11月竟以1比4慘敗於盧森堡腳下，防線形同虛設，佢哋近兩場主場都輸波，加上喺俄超搵食嘅ＦＣ奧倫堡中堅哥積高域今場停賽，令球隊防守力進一步削弱，更加擋唔住烏克蘭攻勢。

烏克蘭近年受戰爭影響無得喺主場比賽，作客對佢哋影響甚微，而且每逢國家隊賽事球員都大踢爭氣波，表現甚佳，今屆喺C組更係戰績彪炳，8戰4勝2和2負，同意大利同得14分，最終僅排第3未能直接出線，要靠附加賽爭晉級。論整體表現亦比波斯尼亞好得多，佢哋中前場有辛真高同梅迪歷等英超球星孭飛，雙中堅係愛華頓米高蘭高同般尼茅夫薩巴尼爾，門將係近期受皇馬重用嘅盧連，陣容攻守兼備，預料可以憑質取勝，客W值捧。