[东方报]世盃歐洲：意大利開火誓響頭炮[06-06]

十七号

變陣改革重震聲威
世界盃歐洲區外圍賽I組，挪威主場迎戰意大利，「北歐海盜」挪威即使擁有曼城射手艾寧夏蘭特，但佢近期狀態欠佳，未必可以發揮最佳水準。至於意大利主帥史巴列堤改革漸見成效，近4場作客取得3勝1和，平手盤值博。（周六凌晨2時45分開賽）

挪威近年湧現多位高質素球星，除咗艾寧夏蘭特之外，仲有阿仙奴中場馬田奧迪加特、馬德里體育會前鋒阿歷山大索洛夫等，整體人腳不俗。不過，挪威國際賽成績仍然冇明顯改善，未能進身上屆歐國盃及世盃決賽周，歸根究底由於國家隊人腳及戰術始終同球會有好大分別，所以就算艾寧夏蘭特等球星踢聯賽有出色表現，但唔代表出戰國際賽能夠踢出同樣水平，何況呢位曼城射手近期狀態欠佳。挪威現時喺I組可以取得2戰2勝，皆因對手只係弱隊摩爾多瓦及以色列，不宜高估。

對賽秤先平手盤抵玩
另邊廂，意大利經過上年歐國盃慘淡表現後，領隊史巴列堤痛定思痛，進行改革及變陣，採取國際米蘭等意甲勁旅近年盛行嘅352陣式，效果立竿見影，上年9月至11月一度5戰取得4勝1和，至於近3場不勝，主因對手係強敵法國及德國，實屬非戰之罪。由於今仗係意大利首場世盃外，必定搏盡力爭打響頭炮。翻查雙方近4次對賽，意大利獲得3勝1和，有力反客為主，贏波而回。