[东方报]歐國聯：德國破法搶第一隊入球[06-08]

十七号

至於早啲開波嘅歐國聯季軍戰，由東道主德國硬撼法國。德國雖然未能衝冠，但仍希望喺自己球迷面前贏波攞番個安慰獎，主場出擊例搶韁，加上近年對住法國經常先入波，不妨捧德軍「第一隊入球」。（周日晚9時開賽）

德國志切喺今屆歐國聯主場捧盃，彌補上年歐國盃主場8強出局嘅遺憾，可惜日前4強慘遭葡萄牙反勝，無奈要踢季軍戰。雖然「兩米美斯」禾達美迪已返回U21報到，但德國都要同本土粉絲交代，戰意點都高過法國，相信會落力爭季軍呢個安慰獎，而且主帥拿高斯文一向以我為主，尤其喺自己地頭踢得更加主動，近8次主場比賽全部先開紀錄，並贏咗6場，可見佢哋擅搶先機，相信今仗會照辦煮碗。

高盧雞輪換戰意成疑
相比之下，法國爭勝嘅意欲比主隊低，主帥迪甘斯就算續用隊長基利安麥巴比，亦好大機會收起其他位置嘅主力，起用馬古斯杜林、高路梅安尼等副選，喺呢場無關痛癢嘅季軍戰練兵，戰力大打折扣。翻查紀錄，雙方近4次交手各贏2次，不過其中3次德國都先入波兼半場領先，可見佢哋對親「高盧雞」例必先發制人，德軍「第一隊入球」捧得過，進取啲可博埋半場主勝。