[东方报]歐冠：利物浦洩氣兼兵疲 皇馬以逸待勞[05-28]

august

全球矚目嘅歐聯決賽今晚深夜爆發，利物浦同皇家馬德里喺中立場法國巴黎上演終極對決。「紅軍」剛失落英超錦標，4冠王美夢落空，加上經歷頻密賽事，球員出現疲態及傷患，難免洩氣。反觀皇馬提早穩奪西甲冠軍，球員以逸待勞，體力有優勢，加上過去7次進身歐聯決賽全部奪冠，可博皇馬 [冠軍]。

利物浦今季打入英聯盃、英足盃及歐聯決賽，加上英超賽事，已經踢咗62場比賽，球員體力負荷極大，結果法賓奴、穆罕默德沙拿、華基爾雲迪積克同堤亞高艾簡達拿近期先後受傷，身體明顯發出警號。雖然前3人傷勢冇大礙可望披甲，但中場指揮官艾簡達拿今仗好可能缺陣，對「紅軍」策動進攻有一定影響。

另一邊廂，皇馬今屆歐聯淘汰賽踢走3大勁旅巴黎聖日耳門、車路士及曼城，盡顯冠軍相。雖然「銀河艦隊」晉級過程驚濤駭浪，但都可以過關，反映球員經驗及心理質素優秀，「歐聯專家」安察洛堤臨場調動亦係一絕。加上前鋒賓施馬狀態大勇，已有15球進帳，勢必成為利物浦心腹大患。

近7次入決賽全奪冠
值得一提，西甲賽會為遷就皇馬出戰今仗，特意安排佢哋提早上周五深夜踢聯賽煞科戰，換言之皇馬比利物浦多兩日時間休息及備戰，一旦要踢加時，體力應會佔優，比較大機會成為最後贏家，加上佢哋近7次入歐聯決賽全部能夠成為冠軍，命中率100%，一於撐皇馬封王。