[东方报]歐國聯：崇尚進攻 塞爾維亞挪威駁火騷[06-02]

august

歐國聯B4組賽事，塞爾維亞主場迎戰挪威。塞爾維亞打入卡塔爾世盃決賽周，歐國聯正好成為佢哋嘅練兵場，挪威雖無緣亮相世盃決賽周，但每次國際賽檔期都非常認真，兩支崇尚進攻嘅球隊交鋒，預期入球偏多，加上塞爾維亞近5仗4次開3球或以上，2.5球大盤放心捧場。

塞軍球員要搏表現
塞爾維亞喺世盃抽籤列入G組，對手有巴西、瑞士及喀麥隆，想喺小組脫穎而出絕非易事，必須好好部署。主帥史杜高域今次未有徵召王牌杜辛華荷域，但前線仍不乏好手，包括剛協助富咸升班嘅阿歷山大米祖域，以及阿積士悍將杜辛泰迪治等，有得落場嘅球員預料都會爭取表現，增加出席世盃機會。

挪威鋒線牌面亦唔輸蝕，艾寧夏蘭特同馬田奧迪加特同屬進攻能手，今年初兩場熱身賽分別贏斯洛伐克2比0，及以9比0狂數同屬B級球隊阿美尼亞，艾寧夏蘭特呢兩仗轟入3粒，踢「太公波」唔會敷衍了事，呢位啱啱轉投曼城嘅球壇新貴，必趁歐國聯證明自己身價，今仗火併塞爾維亞，有望上演入球騷。