[东方报]歐國聯：意大利改革練兵捧半和[06-07]

august

歐國聯A3組另一場，兩支正在改革嘅球隊意大利同匈牙利正面交鋒。意大利領隊文仙尼上場試用年輕球員獲得好評；匈牙利主帥馬高羅斯接手後，亦將球隊慢慢增強，相信今場雙方都會再以「摸着石頭過河」嘅心態作賽，加上匈牙利近4場作客有3次開半場和，值得再追。

意大利同匈牙利都未能殺入年底嘅世盃決賽周，雖然現時雙方正進行改革，不過發展完全唔同。意軍屬傳統勁旅，但連續兩屆入唔到世盃決賽周，要進行一次大刀闊斧嘅改革，屬改革初段。相反，匈牙利由馬高羅斯喺2018年接手後，近年成績有明顯進步，距離打入卡塔爾世盃亦只係一步之差，現時已進入收成期。

匈牙利遇強未驚過
「藍衣軍團」上場試用多位新球員，最終同德國打和1比1，整體表現唔錯，並且創造多次射門。文仙尼嘅做法加上球員場上表現，獲得國內外嘅球迷同傳媒讚賞，相信文帥會繼續利用歐國聯呢個高級熱身賽，作為練兵之地。

匈牙利上場主場爆冷以1比0擊敗英格蘭，球員表現好有信心，其實匈牙利由首屆歐國聯嘅C級聯賽一直「升呢」，上屆升上B級，今屆仲上埋A級聯賽，球員見慣大場面，上屆歐國盃先後打和法國同德國，今場鬥意大利唔會怯場。事實上匈牙利作客踢法穩陣，近4場3次半場同對手打和，今場不妨追多次。