[东方报]歐國聯：荷蘭食住個勢繼續攞威[06-08]

august

歐國聯A4組，剛殺入世盃決賽周嘅威爾斯，今晚主場惡鬥荷蘭。今場係威爾斯今個月內第3仗，賽程異常頻密，而且世盃附激戰過後恐怕未回得切氣；荷蘭上仗大炒比利時，霸氣盡露，加上近3次交手「橙衣兵團」贏晒，明顯實力佔優，客勝屬不二之選。

威爾斯完成任務趁機回氣
威爾斯剛剛喺世盃附決賽，靠對方烏龍波以1比0力克烏克蘭，躋身年底舉行的世盃決賽周。既然完成任務，今場回師歐國聯，預料一班主力將獲得休息機會，今場極可能作大幅度輪換，戰力難以保證。

荷蘭闊別8年重返世盃決賽周，被編入A組，對手只係厄瓜多爾、卡塔爾及塞內加爾，出線應該唔難。佢哋上仗作客大炒強敵比利時4比1，尹戈爾接管帥印後不敗紀錄增至10場，前鋒迪比梅開二度，貝雲積及杜費斯亦有「士哥」，幾位射手同中場戴利白蘭特、貝侯斯及法蘭基迪莊合作無間，攻力相當可靠，而且球隊氣勢正盛，今仗食住個勢有力再下一城，客勝咪錯過。