[东方报]意甲：阿特蘭大半W速食蒙沙[09-05]

august

意甲強弱懸殊之戰，包尾蒙沙主場對阿特蘭大，蒙沙今季升班後，雖然大舉增兵，簽入多位國腳級球員，但由於陣容變動太大，仍未建立默契，開鑼後踢4場聯賽全敗。至於阿特蘭大重拾神奇球隊本色，取得3勝1和，其中3場上半場領先，直取半場客勝。

蒙沙班主係前AC米蘭老闆貝魯斯干尼，「貝老」4年前入主蒙沙後，投入大量資金發展，成功協助球隊升班後，今夏再加碼簽入多位猛將，包括有份協助意大利捧上年歐國盃冠軍嘅中場馬迪奧比辛拿，佢今場會倒戈阿特蘭大。

蒙沙新兵多默契欠佳
另外，中場史提芬奴辛斯、後衞蘭奴捷亞都曾經係意大利國腳，呢班新兵質素唔錯，無奈默契不足，欠缺隊型，結果踢4場聯賽輸晒，失11球，恐怕短期內難翻身。

阿特蘭大上季僅排第8位，失去歐洲賽入場券，變相可以專注本土賽事，表現更佳，即使對住上季冠軍AC米蘭，都可以領先上半場，可惜被逼和1比1，面對魚腩蒙沙，相信阿特蘭大可以由頭贏到尾。