[东方报]歐冠：衞冕第一擊皇馬再攞威[09-06]

august

上屆冠軍皇家馬德里衞冕第一擊，喺F組作客蘇超嘅些路迪。皇馬保留原有班底之餘再補強，簽入法國新星曹亞文尼，更喺周六西甲榜首大戰擊敗貝迪斯，乘勇踏上歐洲賽征途，些路迪實力明顯唔夠，加上皇馬上屆3場歐聯分組賽作客全勝，作客讓一球照捧上盤。

F組除咗皇馬同些路迪，仲有RB萊比錫同薩克達，相信皇馬出線問題唔大，佢哋近4屆有3屆都以分組賽一哥晉級16強，證明佢哋踢分組賽唔會留力，而且上屆3場分組賽作客更加全部贏晒，唔使擔心「銀河艦隊」會留力嘅問題。

皇馬保留原有班底，繼續由名帥安察洛堤執教，射手賓施馬狀態仍然勇猛，雖然莫迪歷同卻奧斯年紀偏大，但今夏再簽入法國新星曹亞文尼後，加上原本嘅雲尼斯奧斯祖利亞及卡馬雲加，逐漸做好新舊交替，現時「銀河艦隊」經驗同活力俱佳，實力遠勝些路迪。

些路迪級數差一截
些路迪近年甚少打入歐聯分組賽，今屆受惠於俄超球隊被制裁，佢哋同薩克達由原本要踢附加賽，變成直入分組賽。些路迪陣中有歐聯經驗嘅球員唔多，只有中場占士科利斯同門將赫特，實力不能同皇馬相提並論，恐怕無力抵擋對手強攻。皇馬肯定以3分為目標，作客讓一球唔算辣，照捧上盤。