[东方报]意甲：拉素格食格平手盤有揸拿[10-10]

august

今晚意甲「紫百合」費倫天拿主場迎戰拉素。費倫開季表現麻麻，攻力疲弱乃致命傷，拉素近年對賽成績佔優，挾聯賽3連勝之勢，有力反客為主，平手盤必捧拉素。

費倫攻力疲弱難靠
兩隊同樣要兼顧歐洲賽，不過聯賽表現差天共地。費倫8場聯賽贏得兩仗咁大把，應付兩條戰線明顯吃力，佢哋最大問題係攻力唔掂，今季聯賽入得7粒，自從上季季中賣走王牌射手杜辛華荷域後，一直未搵到合適代替人選，今夏由皇家馬德里來投嘅盧卡祖域，各項賽事僅入兩球，令人失望。

前列分子拉素喺崇尚進攻嘅主帥沙利領軍下，8場聯賽取得5勝2和僅1敗之餘，狂轟17球，火力僅次於拿玻里及AC米蘭等勁旅，單計近3仗聯賽更贏晒兼冇失波，狀態大勇。箭頭恩莫比尼今季聯賽已有5球進帳，中場米連高域沙域亦有3入球5助攻，火力全開。

論實力及近況，拉素均勝一籌，加上近6次碰頭，拉素獲5勝1負佳績，擺明格食格，恩莫比尼更喺其中4場勝仗取得士哥，恰死「紫百合」，今仗開平手盤咁筍，拉素絕對有捧場價值。