[东方报]西盃：攻力平庸求穩陣 愛奴切爾達和味濃[01-03]

august

今晚將上演西班牙盃32強賽事，當中比較值得關注嘅應該係兩支西甲球隊交鋒，愛斯賓奴主場迎戰切爾達，雙方同屬聯賽護級分子，來到盃賽碰頭，都唔想輸畀對方，以免打擊士氣，影響護級信心。事實上，兩隊一向勢均力敵，近8次對賽有6次打和，預料今仗法定時間90分鐘難分勝負，可博和波爭取高回報。

愛斯賓奴雖然係西甲下游球隊，但近期表現唔錯，上仗聯賽更加逼和榜首巴塞隆拿1比1，近7場正式賽事僅1敗，其中4場和波，可見愛斯賓奴即使贏波機會唔高，但勝在夠硬淨，要擊敗佢哋亦非易事。更何況今場西班牙盃一戰定生死，相信愛斯賓奴會繼續採取穩陣踢法，希望力保不敗，大不了踢加時，甚至以互射12碼分勝負。

7場作客僅入4球
至於切爾達上仗西甲打和西維爾1比1，近4場正式比賽保持不敗，相信今場唔會太輸蝕。考慮到切爾達攻力比較弱，今季踢15場聯賽僅入15球，其中7場作客只有4球進帳，恐怕難以攻入愛斯賓奴大門，預料都會先求站穩陣腳，相信比賽過程拉鋸居多，和味相當濃。