[东方报]意甲：硬撼拿玻里唔敢進取 前鋒啞火國米獻細[01-04]

august

今晚意甲前列大戰，「5哥」國際米蘭主場硬撼榜首拿玻里。國米今季遇強即屈，兩大前鋒盧卡古同拿達路馬天尼斯喺世盃頻失機，信心未復，拿玻里近年對國米少贏波，作客必定先求穩陣，2.5球入球細更可取。

國米今季特點係遇強腳軟，除咗世盃前險勝阿特蘭大外，今季對住AC米蘭、祖雲達斯、拉素、羅馬，甚至異軍突起嘅烏甸尼斯，全部輸波收場，因此今仗面對弗到漏油嘅拿玻里，唔敢踢得咁進取。而且中場米希達利恩、查漢奴古同波索域飽受傷患困擾，最弊係兩大前鋒盧卡古同拿達路馬天尼斯喺世盃表現欠佳，「比利時魔獸」盧卡古一場4度失機，拿達路馬天尼斯雖為阿根廷奪冠成員，但一球不入由正選變後備，信心受盡打擊。

世盃休戰影響狀態
另一邊廂，拿玻里今季15仗聯賽豪取13勝2和，係意甲唯一不敗之師，域陀奧森漢、基華拉斯基利亞、夏榮羅辛奴、施連斯基及金玟哉等表現出色，其中域陀奧森漢更以9球位居射手榜榜首。但始終經過世盃休戰期，拿玻里狀態亦受到影響，休戰期間與維拉利爾同里爾「拍跳」都輸波。加上兩軍近7次碰頭，拿玻里贏得1場咁大把，點都有所忌憚，而呢7次交手有6次係1球起、2球止，證明大家都小心為上，今仗唔慌多波入。