[东方报]西盃：皇馬睇定食半和發維[01-19]

august

今晚西盃16強上演「西甲內訌」，皇家馬德里作客硬撼維拉利爾。「銀河艦隊」啱啱失落西超盃，力疲心傷，嚟緊賽程超級頻密，隨時勒住踢睇定嚟食；維拉利爾向來硬淨，加上兩軍近年對賽初段常演悶戰，半場和有計。

皇馬季初順風順水，查實有啲運氣，嚟到世盃後復賽，比賽過多導致體能不足問題逐漸浮現。佢哋上周遠赴沙特踢西超盃，4強僅憑互射12碼淘汰華倫西亞，決賽對住巴塞全場捱打，最終輸1比3，中場冇咗受傷嘅曹亞文尼，卡馬雲加拍住兩老莫迪歷同卻奧斯，無論截擊力及速率都嚴重下降。「銀河艦隊」復賽後5仗僅入6球，其中3球嚟自12碼，火力平平。不過主帥安察洛堤冇時間「哭波喪」，事關2月又要出戰世冠盃，賽程咁頻密一定要識留放，有需要時刻意拖慢節奏，睇準先出擊，等眾將回回氣。

維拉利爾主場交鋒唔輸蝕
維拉利爾踢法向來硬淨，近7仗正式賽事保持不敗，查實佢哋近6次主場對皇馬，取得1勝5和未輸過，包括本月聯賽主場贏2比1，唔講得笑，咁快又喺地頭交鋒，「黃潛」心理上已經佔優。翻查紀錄兩軍近3次碰頭半場都係0比0，今仗再開唔奇。