[东方报]英超：賓福特托弗下盤起筷[01-22]

august

同曼城同時間開波嘅，仲有場列斯聯對賓福特，呢場可能會被球迷忽視，不過呢場先至好路。賓福特近7場聯賽保持不敗，包括最近嘅3連勝，面對排15位嘅列斯聯竟然有得受讓平半，賓福特下盤筍到爆。

富咸、白禮頓及賓福特今季被球迷稱為「驚喜三寶」，未計今輪成績，分別排6至8位，有力爭下屆歐洲賽入場券，如果長捧佢哋都有唔少斬獲。

賓福特近況弗爆，近7場聯賽4勝3和保持不敗，手下敗將包括利物浦同曼城，絕對唔係符碌，今場再贏就會締造聯賽4連勝。賓福特前鋒艾雲東尼表現生猛，聯賽上陣17戰入13球，僅次於艾寧夏蘭特及哈利卡尼，於英超神射手榜排第3，佢同尤尼韋沙及麥比奧莫組成嘅三叉戟，絕對有力喺今場入到波。

列斯聯近況差讓唔起
列斯聯上周中英足盃第3圈重賽，主場5比2大勝卡迪夫城，亦由於呢個賽果令佢哋今場賠率偏熱，其實列斯聯對上7場正式賽事，合共只得3和4負，呢一支唔識贏波嘅球隊居然要讓波，真係信唔過，賓福特下盤放心捧場。