[东方报]英超：曼城半場勝派利是[01-22]

august

衞冕英超嘅曼城，周中補賽反勝熱刺後，再於主場出擊，大年初一晚迎戰狼隊。狼隊係曼城「私房菜」，近5次交手「藍月亮」贏晒之餘，4次半場已經領先，狼隊換完領隊都冇乜大起色，隨時半場已經畀曼城攻陷，半場主勝熱得有道理。

曼城日前鬥熱刺，雖然半場一度落後，但最終反勝4比2，士氣大振。呢場贏波除咗避免進一步被阿仙奴拋離，最重要係之前3次正選上陣都冇波入嘅艾寧夏蘭特，終於搵番射門鞋，再加上馬列斯狀態大勇，曼城恐怖攻力又返番嚟。

「藍月亮」主帥哥迪奧拿上仗另一妙着，係畀奇雲迪布尼休息。呢位比利時中場自從世盃後，喺場上表現患得患失，哥帥畀佢獲得充分嘅休息，對迪布尼本身，以及球隊爭標路途都非常重要。今場奇雲迪布尼預料會重回正選，佢之前5次鬥狼隊，合共交出5個入波及3個助攻，助球隊呢5次交手全勝之餘，4次半場已經領先。

狼隊對Big 6全敗
狼隊上周中英足盃第三圈重賽0比1不敵利物浦，士氣受挫，盧比迪古上任連贏兩場之後，球隊又再打回原形。狼隊現時聯賽19戰17分排喺16位，距離降班區只剩兩分，由於實力所限，今季對強隊成績不濟，佢哋近5次聯賽對Big 6全敗，完全冇招架能力，今場對住急切搶分嘅曼城冇爆冷空間，隨時由頭輸到尾，推介半場主勝。