[东方报]德甲：法福硬淨細守拜仁[01-28]

august

今晚德甲尾場上演前列大戰，榜首拜仁慕尼黑主場火併「4哥」法蘭克福。拜仁復賽後連和兩場，一眾進攻球員狀態麻麻，法蘭克福近況不俗，今場造訪勁旅必定先求穩陣，中位數3.5球嘅入球細不容錯過。

德國喺上年世盃分組賽出局，一眾國腳返回拜仁後仍未回魂，歇冬後接連賽和RB萊比錫同科隆，尤其係上仗對科隆，若非甘美治完場前轟入世界波，隨時輸埋。除咗門神紐亞同前鋒沙迪奧文尼養傷外，多名進攻球員如穆斯亞拿、利萊辛尼、京士利高文及基拿比都未撻着，基拿比更因表現太曳半場就被換走，有指基拿比上周日竟然去咗巴黎睇時裝騷，高層認為佢嘅行為業餘，今仗被雪唔奇。唔單止前線熄火，拜仁防守同樣甩漏多多，就算簽入瑞士門神恩尼森馬頂檔，但中堅烏柏美卡奴不時「自爆」，令人擔心。

積分緊湊睇定嚟攻
另一邊廂，法蘭克福走勢唔錯，近8仗聯賽取得5勝2和僅1敗，包括復賽後先大勝史浩克3粒，再被弗賴堡逼和1比1，單計近6仗聯賽僅失7球，有5次開3球或以下，非常硬淨，今仗作客更加會先做好防守。再睇埋積分榜，雖然拜仁順利獲得「半程冠軍」，但只領先「法福」5分，就算第6位嘅弗賴堡亦同樣落後5分，比起之前幾年拜仁半季已帶甩幾條街，今季德甲爭持激烈，拜仁依家明顯未入局，連和兩仗亦打擊信心，今仗唔會輕舉妄動，3.5球嘅入球細有計。