[东方报]英超：防反戰術食住控傳 熱刺快打曼易搶先機[02-05]

august

今晚英超爆發激戰，熱刺主場硬撼曼城。兩隊上月先喺聯賽首循環交鋒，熱刺半場領先兩粒下，下半場走晒樣被曼城反勝4比2，短時間內再碰頭，預期戰況一樣咁激。熱刺防反煞食，對住「藍月」控傳踢法往往能先發制人，包括近3次交手全部先入波，加上主場出擊 ，熱刺嘅「第一隊入球」博得過。

熱刺早前接連不敵阿仙奴及曼城，好在近兩仗又連贏富咸同普雷斯頓，總算回穩。佢哋今個冬窗積極增兵，包括從愛華頓手上搶簽嘅丹祖馬，已於上仗對普雷斯頓開齋入波，壓線日再重金簽入曾效力曼城嘅右閘柏度樸路，此子今仗有望倒戈，雖然主帥干地因病入院無法領軍，但一班球員落到場就會啟動「自動波」，識得點踢。

曼城轉會窗冇增兵
曼城冬窗冇乜增兵之餘，仲放走埋祖奧簡斯路，原班人腳應付下半季。雖然佢哋早前贏過熱刺，但查實兩隊近年交手互有勝負，熱刺嘅快速反擊遇上哥迪奧拿嘅控傳踢法，往往能佔得先機，好似上次對賽，熱刺作客都可以半場領先兩粒，返到主場兼陣容加強，睇怕又可先拔頭籌。