[东方报]德盃：留力護級波琴惡唔出樣 多蒙特托弗搶Ｗ[02-08]

十七号

今晚德國盃16強上演德甲內訌，波琴主場硬撼多蒙特。波琴喺聯賽深受降班威脅，無力兼顧盃賽，「蜜蜂兵團」多蒙特挾4連勝之勢，有力贏波晉級，客勝有計。

波琴復賽後表現唔錯，近4仗聯賽獲2勝2負，其中上仗更大勝賀芬咸5比2，不過睇番呢4仗佢哋場場有失波，合共失咗10粒，防守確係唔穩陣。再睇佢哋依家喺聯賽只排第15位，比起尾3嘅史特加只係多3分咁大把，護級形勢仍未樂觀，相信波琴冇乜心力放喺盃賽，就算今仗有地利亦不宜高估。

蜜蜂兵團近4仗轟13球
另一邊廂，今季跌跌碰碰嘅「蜜蜂兵團」多蒙特，自從復賽後重拾佳態，近4仗聯賽全部贏晒，狂轟13球，攻力強勁。小將祖迪比寧咸及基奧雲尼雷拿狀態大勇，其中基奧雲尼雷拿屢建奇功，呢4仗入咗3粒，而且箭頭施巴斯坦賀拿亦戰勝癌魔復出，上仗大勝弗賴堡5比1之役建功，取得佢加盟多蒙特後首個士哥，嗰日仲係世界癌症日，入波對佢可謂意義重大，亦令大軍士氣大振，今場必定食住個勢喺盃賽發圍，客勝咪錯過。