[东方报]英超：紐卡素旺半和唔赦紅軍[02-18]

august

今晚英超尾場仲有紐卡素主場迎戰利物浦。紐卡素高踞聯賽第4，不過球隊下星期就要喺英聯盃決賽火併曼聯，呢場波係沙特財團入主後首場決賽，重要性唔使多講，所以今場聯賽勢必以穩陣為主。利物浦今季表現飄忽，唔多可靠，既然「喜鵲」近6仗聯賽全開半場和，一於再追。

留力英聯盃決賽鬥曼聯
紐卡素近7仗4勝3和，主帥艾迪侯域作風穩重慢熱，先穩守上半場，下半場再搶攻，近10仗賽事9次開半場和，當中6仗聯賽全開半場和，佢哋下星期要應付英聯盃決賽，紐卡素隨時放慢節奏，加上般奴古馬雷斯繼續停賽，今場唔會咁進取。

利物浦上仗默郡打吡擊敗愛華頓，迎來2023年聯賽首捷，新援加普終於開齋入波，今場勢必乘勝追擊。不過「紅軍」今季經常踢「海鮮波」，就算上仗交出好表現，今仗未必能夠保持，預計今仗極其量同紐卡素踢成均勢，紐卡素主導賽事之下，半場和更加高唱入雲。