[东方报]意甲：聯賽一哥弗到拉唔住 拿玻里主Ｗ趁熱食[03-03]

十七号

意甲前列大戰，榜首拿玻里主場對拉素；「一哥」拿玻里走勢銳不可當，已經拋離第2位「米蘭雙雄」18分，冠軍在望，今仗勢必乘勝追擊，爭取早日「登基」。拉素狀態一般，加上過去4次同拿玻里交鋒，結果都輸波而回，明顯被對手食住，捧1.5倍主勝穩陣。

拿玻里今季能夠一枝獨秀，皆因保持極穩定水準，踢24場聯賽獲得21勝2和1負，其中11場主場更加有10勝1和，表現近乎完美。拿玻里最犀利係攻力強勁，聯賽已轟入58球，比第2位國際米蘭多14球，「OK」進攻組合域陀奧森漢、基華拉斯基利亞演出神勇，前者有19球進帳，排射手榜第1位，被意大利傳媒封為「非洲夏蘭特」，至於翼鋒基華拉斯基利亞有10球進帳及9次助攻，堪稱意甲最強進攻組合，今場要撕破拉素防線並不困難。

拉素遇強腳仔軟
至於拉素排第4位，已落後拿玻里20分，足以反映兩隊級數有極大距離，所以「藍鷹」最大目標只能為下屆歐聯入場券而戰，鬥心唔及對手。雖然拉素近4場比賽取得3勝1和，但要留意對手只係弱隊克盧日、沙蘭力坦拿，以及森多利亞，上月對兩支實力稍強球隊祖雲達斯、阿特蘭大，結果都係輸波，更何況今仗遇上超班嘅拿玻里，恐怕拉素難逃一敗。