[东方报]英超：各有所圖唔會縮 曼城紅軍大駁火[04-01]

august

今晚英超重頭戲，曼城主場迎戰利物浦，兩軍各有所圖，第2位曼城急需搶分，追趕榜首阿仙奴，勢必把握地利主攻求勝。利物浦亦要爭入前4位，奪取下屆歐聯入場券，絕不能退縮。考慮到雙方崇尚進攻踢法，每逢交鋒例必駁火，近7次對賽有6次總入球開出4球或以上，一於再追中位數3.5球嘅入球大。(Now 621及611周六晚7時30分直播)

曼城落後阿仙奴8分，但踢少對方1場，只要今仗贏波，就可以拉近距離至5分，戰意必定高昂。事實上「藍月亮」由2月底開始，愈戰愈勇，取得6連勝，並且鋒線火力全開，近2仗更加合共轟入13球，實在非常誇張。

夏蘭特有傷似煙幕
雖然首席射手艾寧夏蘭特聲稱有傷在身，缺席早前國際賽，但一般估計係煙幕居多，留力應付今場大戰，更何況隊內不乏數胡高手，祖利安艾華利斯上仗英足盃梅開二度，要攻入利物浦防線，並唔困難。

至於利物浦喺歐聯16強出局後，如果想下屆再參加呢項大賽，最起碼要取得英超前4位，球隊背城借一，作客都要以贏波為目標，應會搶攻。紅軍曾於早前英超大炒曼聯7比0，首循環聯賽亦贏過曼城、熱刺及「雙殺」紐卡素，可見佢哋面對前列勁旅，遇強愈強，踢法亦非常進取，相信今仗無懼同曼城鬥攻，好大機會再次上演入球騷。