[东方报]英超：前4保衞戰不容有失 曼聯托弗下盤有着素[04-02]

august

英超爆發前4搶分關鍵戰，紐卡素主場迎戰曼聯，今季英超歐聯入場券爭崩頭，阿仙奴、曼城穩佔兩席，餘下兩席至少有4隊爭奪，位居前4嘅曼聯今場對直接競爭對手紐卡素嘅「6分波」不容有失，翻查對賽，雙方近7次交手曼聯5勝2和，包括英聯盃決賽擊敗紐卡素捧盃，今仗再度交鋒，曼聯受讓平半必捧下盤。（Now 621及611周日晚11時30分直播）

紐卡素暫時排喺第5位，僅落後第4位熱刺2分但踢少兩場，爭入前4機會看好，球隊近況亦不俗，聯賽2連勝，不過對手只係狼隊同森林等實力較次對手，佢哋較早前遇到強隊就唔識踢，例如之前對利物浦、曼聯及曼城等硬仗3連敗，3場波膽都係輸0比2，更失落英聯盃錦標，攻擊主力米基爾阿米朗仍然養傷，今仗再戰曼聯仲要讓波，實在唔睇好。

關鍵6分波必搏盡
曼聯排喺前4，依家要同時應付聯賽、歐霸盃及英足盃3條戰線，雖然聯賽爭標無望，但連同之前到手嘅英聯盃冠軍，今季仲有機會爭「小3冠」，歐聯入場券亦志在必得，佢哋之前英聯盃已經贏過紐卡素，今仗如再擒「喜鵲」，將可鞏固前3位置，相反輸波嘅話有機會跌出前4，所以全隊上下都好肉緊。

拉舒福特傷愈候命
「紅魔鬼」今場有卡斯米路停賽影響較大，不過華拉尼、拉舒福特同安東尼馬迪爾都已傷愈復操，特別係「福仔」傷勢完美避開國際賽檔期，抖足精神上陣，預計會繼續爭取士哥。

下季再見！加拿祖去踢世青
早前因韌帶受傷正在休養嘅加拿祖，雖然傷勢唔嚴重，但今季可能無法再為曼聯上陣，因為佢5月份要幫主辦國阿根廷角逐世青盃，將會錯過曼聯季尾最後數場重要賽事。

阿根廷傳媒報道，今屆世青盃比賽日期定於今年5月20日至6月11日，18歲嘅加拿祖將成為阿根廷領軍人物，根據FIFA規定，曼聯到時必須放人。加拿祖將於5月中離隊，將錯過曼聯最後兩輪聯賽對般尼茅夫及富咸，假如球隊打入英足盃決賽及歐霸盃決賽，加拿祖亦會全數缺陣。

勞基梳爾同意續約４年
據英國媒體報道，曼聯左後衞勞基梳爾已經同意續約4年，意味其紅魔鬼生涯將會突破10年大關，成為球壇少數忠臣。勞基梳爾今季不時客串中堅，表現稱職，令領隊坦哈格排兵布陣更加靈活，會方梗係要綁實佢，繼上年12月啟動優先續約1年條款，依家再延長多4年合約，奠定防線支柱地位。

伊沙克回勇勢成紅魔大患
紐卡素今晚就會喺主場迎戰曼聯，成為球隊能否打入前4位奪取下屆歐聯入場券嘅關鍵之戰，「喜鵲」今仗要屠「魔」，前鋒阿歷山大伊沙克將扮演重要角色，呢位23歲瑞典國腳近期終於走出傷患陰霾，成為紐卡素搶分王牌。

近兩場英超入3球
阿歷山大伊沙克上年夏天以6,300萬鎊轉會費由皇家蘇斯達加盟紐卡素，首3次上陣射入2球，踢出身價波，但上年9月中受傷，一度缺陣16場比賽，直至今年1月先至復出，導致有一段時間狀態低迷，曾經喺10場比賽之中僅入1球。好在阿歷山大伊沙克信心冇因此受打擊，近兩仗英超合共轟入3球，協助紐卡素擊敗狼隊及諾定咸森林，連取6分。

值得一提，阿歷山大伊沙克今季英超上陣10次入6球，平均115分鐘入1球，以有5球或以上進帳嘅球員計算，入球率僅次於平均76分鐘入1球嘅曼城射手艾寧夏蘭特，效率非常高，勢必成為曼聯心腹大患。