[东方报]意甲：薩斯索羅贏波冇甩拖[04-03]

十七号

今晚意甲尾場中游對決，薩斯索羅主場迎戰拖連奴。薩斯索羅聯賽4連勝，氣勢如虹，拖連奴上輪慘敗打窒道氣，加上客場表現一般，寧買當頭起，平手盤必捧薩斯索羅。（Now 638周二凌晨2時45分直播）

講到意甲近期最弗球隊，除咗榜首拿玻里之外，就到薩斯索羅，呢支中型班喺世盃前後曾經歷7仗輸6場，好彩喺1月尾及時反彈，近9仗聯賽取得6勝2和僅1敗，嗰場敗仗仲要輸畀拿玻里，若果單計近4仗聯賽全部贏晒，包括作客贏羅馬4比3，前鋒杜文尼高貝拉迪同羅尼安迪輪流發威，不容忽視。

拖連奴狀態飄忽
拖連奴雖然比薩斯索羅多1分，但狀態飄忽，近6仗聯賽只得2勝1和3負，其中上仗主場對拿玻里慘吞4蛋，表現奇差，初段失波後即潰不成軍。睇番拖連奴客場戰績麻麻，今季14仗聯賽作客，只得5勝3和6負失咗21粒，其中12仗有失波，防守不穩，造訪弗到漏油嘅薩斯索羅，凶多吉少。