[东方报]英超：爭冠關鍵唔衰得 阿仙奴強襲韋斯咸[04-16]

august

英超冠軍爭逐白熱化，上輪作客利物浦失分嘅「1哥」阿仙奴，今場作客韋斯咸絕對不容再失，球員戰意高昂。幸好「兵工廠」今季打吡戰擁超強成績，5場「倫敦打吡」作客錄得全勝，面對踢完歐霸客戰未回氣嘅韋斯咸贏面甚高，客勝可以放心捧場。（Now 621及611周日晚9時直播）

阿仙奴喺英超7連勝後，上仗作客晏菲路領先2球下，慘被利物浦逼和2比2，痛失爭標關鍵2分。不過阿仙奴整體表現唔差，一對巴西前鋒加比爾捷西斯同加比爾馬天尼利狀態大勇，捷西斯傷愈復出後近2場入3球、馬天尼利就近8場入7球，火力極有保證。

兵工廠踢倫敦打吡特醒
阿仙奴今季踢「倫敦打吡」特別醒神，先後作客橫掃水晶宮、賓福特、車路士、熱刺同富咸，而且5場客勝都能夠保持不失，贏得極具說服力。賽前消息指阿仙奴有前鋒尼基迪亞傷愈復出，攻擊線調動更加靈活，相信可以一舉擊破「錘仔幫」。

韋斯咸依家身處降班漩渦，領隊莫耶斯備受下台壓力，球隊演出亦頗為飄忽，上次喺主場出擊就以1比5慘負紐卡素腳下，而且佢哋周中喺歐協聯作客同真特激戰踢成1比1，休息唔夠72小時就要硬撼阿仙奴，體能上肯定輸蝕，而且又有次回合後顧之憂，阿仙奴客勝值得捧場。