[东方报]英超：紐卡素強勢客Ｗ冇甩拖[04-27]

十七号

力保英超前4嘅紐卡素今晚作客「拖肥」愛華頓。「喜鵲」上仗火力全開，大炒熱刺6比1，盡顯「新土豪」霸氣，今仗勢必乘勝追擊。以佢哋近7場聯賽6勝1負嘅強勢，愛華頓想搶分護級亦有心無力，客勝值博。（Now 622周五凌晨2時45分直播）

紐卡素現時比第5位嘅阿士東維拉多5分，仲要踢少對方兩場，爭取前4席位機會樂觀，但「喜鵲」餘下對手仲有兩支勁敵阿仙奴及白禮頓，並唔易踢，今晚對住積弱嘅愛華頓，更要力爭贏波，以免留下後患。

事實上，紐卡素狀態相當好，近7場英超除早前不敵大勇嘅維拉之外，其實6場都贏得充滿說服力，一眾鋒線球員腳風甚順，阿歷山大伊沙克近4場省入4粒，加上哥林威爾遜及祖連頓亦頻頻建功，進攻點夠晒多。

愛華頓對賽往績輸蝕
愛華頓護級形勢水深火熱，但礙於實力所限，表現往往有心無力，近5場英超只有3和2負，包括主場1比3不敵中游球隊富咸。睇番兩隊近5次對賽，「拖肥糖」輸足4次，今仗有主場之利都凶多吉少。