[东方报]英超：白禮頓狼隊再演入球騷[04-29]

august

英超周六好戲碼，白禮頓主場迎戰狼隊，「海鷗」踢法極具侵略性，佢哋仲有機會爭歐洲賽資格，主場出擊肯定加多兩錢肉緊，狼隊近4仗取得3勝「上岸」在望，兩隊實力接近，加上雙方近5次交手4次開3球或以上，包括首循環白禮頓險勝3比2，必捧2.5球大盤。（Now 621周六晚10時直播）

兩隊近年碰頭多交收
白禮頓上周在英足盃4強惡鬥曼聯，戰至互射12碼輸波出局，雖敗不辱，之後喺聯賽周中快車作客輸畀諾定咸森林，不過分數上同歐洲賽資格距離唔遠，唔會咁快放棄。佢哋暫時排第8，季中接手球隊嘅迪薩比功勞甚大，呢位意大利籍教頭主張悅目進攻足球，一眾攻擊主力三笘薰、韋碧克、阿歷斯麥亞里士打均有出色發揮，尤其係日本國腳三笘薰今季大爆發入球不斷，球迷戲稱為「三球王」，「海鷗」爭取下屆歐洲賽資格仍未絕望，預計今仗會繼續搶攻。

另一邊廂，狼隊護級就快「上岸」，佢哋周中快車主場擊敗水晶宮，累積37分暫時壓力冇咁大，相信會踢得更放，不過佢哋作客防守表現稍差，已經連續15場作客未能保持清白，當中近4場作客共失7球，預計頂唔住白禮頓進攻，今場入球唔會少，2.5球入球大乃不二之選。