[东方报]意甲：祖記啞火鬥萊切捱細界[05-03]

十七号

今晚意甲開快車，祖雲達斯主場迎戰萊切。呢場看似強弱懸殊，但祖記狀態下滑，主帥阿里基又一向保守，今仗唔敢太冒進，萊切為搶分護級必定小心為上，加上客場例死守，2.5球入球細更值博。（Now 638周四凌晨零時直播）

祖雲達斯雖然早前拎番被扣嘅15分，得以重上第3位，但狀態明顯回落，近5仗只得2和3負未贏過，兼僅入2球。

為保前4穩陣行先
祖記除咗上周中意盃4強遭國際米蘭淘汰，上仗聯賽亦只能逼和博洛尼亞1比1，此役仲有米利克射失12碼，呢5仗全開2球或以下，攻力欠銳。生性謹慎嘅主帥阿里基唔會冒險，為咗保住前4嘅下屆歐聯入場券，就算遇弱都會穩陣行先。

另邊廂，萊切上輪擊敗烏甸尼斯，取得久違嘅勝仗，依家位處第16位，領先第18位嘅史柏斯亞4分，令護級重現曙光，戰意毋須懷疑。儘管萊切作客戰績麻麻，但非常重視防守，今季16仗聯賽作客失18粒，係下游球隊中客場失波較少球隊，單計近4仗聯賽作客，全開2球或以下，今仗造訪態沉嘅祖記，預計會照擺鐵桶陣，希望搶得1分得1分，2.5球入球細好路。