[东方报]欧国联：季軍戰冇包袱荷意做大騷[06-18]

august

今晚歐國聯季軍戰，由荷蘭鬥意大利。身為主辦國嘅荷蘭，4強出局後已經冇晒面，唯一目標係攞番個尾彩，就算防線欠穩都照搶攻求勝。重建中嘅意大利以試陣為主，冇心理包袱下隨時踢得更放。睇番荷蘭近5場法定時間總入球全開3球或以上，再追中位數2.5球嘅入球大。（周日晚9時開賽）

橙軍攻強守弱易失波
荷蘭上仗對克羅地亞先開紀錄，點知下半場連失兩粒，雖然補時扳平2比2，但加時又失多兩球，最終輸2比4，就算朗奴高文回巢執教，攻強守弱問題仲未解決。事實上「橙軍」傳統風格崇尚進攻，要入波唔成問題，但防線谷得太上，往往被對手反擊打爆，近5場比賽除咗對魚腩直布羅陀冇失波，其餘4場法定時間共失9粒，今仗面對擅打反擊戰嘅意大利，難保清白身。

意大利4強以1比2不敵西班牙，近4仗輸3場難免令人失望。領隊文仙尼繼續試新嘢，或派遣新進箭頭列迪古擔正，呢位喺阿根廷土生土長嘅24歲「外援」射術唔曳，3月兩場歐國外都有波入，有機會落場必爭取表現，大盤唔怕追。