[东方报]英超：曼聯強陣出擊上盤贏特[10-07]

august

今晚英超曼聯又登場，將主場迎戰賓福特，「紅魔鬼」喺聯賽同歐聯再吞2連敗，坦哈格出現帥位危機，不過坦帥仍獲管理層支持，今晚對近況同樣差劣嘅賓福特，肯定要贏波交代，加上雙方近4次交手曼聯有3勝1負成績支持，曼聯讓半球、一球撐上盤。（Now 621周六晚10時直播）

曼聯上仗聯賽0比1不敵水晶宮，聯賽7輪4負，創下1989年以來最差開局，轉戰歐聯再以2比3不敵加拉塔沙雷，歐聯分組賽2連敗包尾，主帥坦哈格處境同當年蘇斯克查差唔多，隨時被炒，不過最大分別係坦帥繼續獲管理層盲撐，認為佢係曼聯復興嘅合適人選，近日成績唔好只係受傷兵影響，同一時腳風唔順，「紅魔鬼」今場聯賽肯定要贏波交代，戰意唔需要懷疑。

安東尼復出做正選
坦哈格今場繼續調整陣容，因家暴事件缺陣多場嘅安東尼馬菲奧斯重回正選，同拉舒福特雙翼齊飛，上仗歐聯梅開二度嘅海倫力爭首個英超入球，蘇夫恩岩拉伯特繼續客串左閘，中堅會用對般尼一仗交靚助攻嘅莊尼伊雲斯，拍住華拉尼，門將繼續係奧拿拿。

賓福特近況奇差
至於賓福特今季成績同樣走下坡，開季7戰僅得1勝4和2負，而且近況奇差，各項賽事近7仗法定時間錄得3和4負，包括前仗聯賽主場1比3不敵愛華頓，上仗面對10人應戰嘅諾定咸森林，喺領先優勢下仍被對手逼和，今仗到訪奧脫福球場輸波並唔意外。