[东方报]意甲：國米平手盤十拿九穩[12-03]

august

今晚意甲尾場大戰，衞冕嘅拿玻里主場硬撼「2哥」國際米蘭。拿玻里雖有老帥馬沙利回巢救亡，但今季經常「主場不利」，國米各項賽事近11場未輸過，平手盤可謂坐和望贏。（Now 638周一凌晨3時45分直播）

上季拿玻里事隔33年重奪意甲冠軍，不過功勳教頭史巴列堤掛冠而去，而接替佢嘅魯迪加西亞，好明顯駕馭唔到班波。

拿玻里主場踢得仲差
最離奇係拿玻里出現「客強主弱」情況，單計聯賽作客7戰獲5勝2和不敗，係客場成績最好球隊，反而6次聯賽主場出擊，只得2勝1和3負，連同各項賽事，近5次主場僅得2和3敗未贏過，堪稱主場不利。

另邊廂，國米表現穩定，各項賽事近11場錄得8勝3和不敗佳績，包括上周中歐聯對皇家蘇斯達，盡出副選兼落後3球之下，竟然追和3比3，士氣大振，而一眾正選又抖到夠，枕戈待發。國米今季13場聯賽獲10勝2和1負，入30球失7球，係入波最多及失波最少球隊，單計作客錄5勝1和，係客場成績次佳球隊，而以13粒位居射手榜榜首嘅隊長拿達路馬天尼斯，其中8球係來自客場，絕對係客場殺手，今場造訪主場腳軟嘅拿玻里，有力贏波而回。