[东方报]意杯：Ａ米易失波大盤打卡[01-02]

十七号

今晚意大利盃16強，ＡＣ米蘭主場鬥卡利亞里。Ａ米近4仗獲3勝1和，勢必乘勝追擊，但佢哋防線欠穩，恐難保清白之身。考慮到Ａ米近7場比賽有6場總入球開3球或以上，博中位數2.5球嘅入球大。（周三凌晨4時開賽）

Ａ米喺歐聯已經出局，意甲亦落後榜首國際米蘭9分，惟有向意大利盃同歐霸盃埋手，當中意盃難度較低，相信會全力爭冠。Ａ米攻力唔曳，盧卡祖域及基斯甸普列錫等人輪流發威入波，有力攻破客軍大門。問題係佢哋防線靠唔住，早前對魚腩沙蘭力坦拿都要失兩粒，加上中堅湯姆利養傷，可能焗用左閘迪奧靴南迪斯扼守中路，好大機會失波。

卡利亞里遇強唔死守
卡利亞里近7場僅得1勝，但佢哋遇強唔會刻意死守，今季聯賽作客祖雲達斯及拿玻里，都搵到入球，同樣僅負1比2，主場亦曾以1比3不敵Ａ米，今晚會繼續踢開放足球，入球大值捧。