[东方报]亞洲盃：國足冇攻開半場講和[01-22]

十七号

卡塔爾篤定首名玩輪換
今晚亞洲盃A組尾輪關鍵戰，東道主卡塔爾硬撼中國。卡塔爾已提早鎖定首名出線，今場隨時大輪換，國足今屆守強於攻，2戰食白果但冇失波，為晉級必定排出血肉長城，先求穩陣，加上近年碰頭旺半場和，不妨再追。（HOY TV 77台周一晚11時直播）

卡塔爾頭2輪贏晒兼冇失波，全取6分過程輕鬆，現時已領先次席中國4分，宣布提早取得首名出線，即係話今場只係例行公事。為免有主力受傷影響之後打淘汰賽，據報卡塔爾今場會收起箭頭艾莫爾斯阿里同中場發電機阿克林阿費夫，佢哋包辦晒卡軍今屆全部4個入波，冇咗佢哋攻力大減。

武磊張玉寧腳頭無靈
另邊廂，中國頭2輪全部互交白卷，以「武球王」武磊同張玉寧為首嘅鋒線，表現確係差強人意，但換個角度嚟睇，連續2場都保持清白之身，以往防守大意嘅問題有所改善，證明主帥阿歷山大．揚科維奇採用5人防線，先做好防守嘅策略係奏效。雖然贏波就一定晉級，但國足確實冇強攻本錢，務實嘅阿歷山大．揚科維奇唔會輕舉妄動。翻查紀錄，兩軍近4次正面交鋒，有3次半場打和，呢3次半場都係互交白卷，半場和值得追多鋪。