[东方报]亞洲盃：南韓大盤手到拿「來」[01-25]

十七号

南韓喺亞洲盃E組最後一輪，遇上兩戰全敗提早出局嘅馬來西亞，堪稱不勝無歸。不過主勝同半場主勝賠率同樣熱到辣手，睇番「太極虎」近績，近7場有5次開4球或以上，嚟到接近淘汰賽階段，士氣好緊要，呢場唔單止贏，仲應該會大炒，3.5球入球大玩得過。（周四晚7時30分開賽）

南韓上場同約旦踢成2比2，雖然賽後出現各種走線「陰謀論」，話佢哋唔想出線後太早對日本，但如果「太極虎」真係要走線，就冇必要攻到補時追和，今仗分組煞科戰必定全力爭勝，戰意唔使懷疑。現時手執4分嘅南韓，目標當然係奪冠，球隊火力強大，李康仁及李在城喺兩翼策動攻勢，頭兩場分組賽見到兩人製造到不少機會，曹圭成同孫興民只要腳風順番啲，入2、3粒應該無問題。

馬來西亞有權入波
馬來西亞分組賽兩戰全敗注定出局，今場如果「泊大巴」一樣會畀南韓搓死，倒不如放手一搏爭取吓入波。事實上南韓防線唔算穩陣，兩場分組賽都有失波，馬來西亞並非冇機會，今場推介大家玩入球大。