[东方报]英聯盃：決賽合例小心謹慎 車仔紅軍和以為貴[02-25]

august

英聯盃決賽今晚喺溫布萊爆發，由車路士同利物浦爭霸。兩隊近8次交手法定時間7次打和，包括前季英聯盃及英足盃兩場決賽踢成0比0，「紅軍」兩次都射贏12碼捧盃，心理上佔優，不過「藍戰士」士氣唔曳，決賽場合例必小心謹慎，再追和局。（HOY TV 77台周日晚11時直播）

英超榜首利物浦月初聯賽曾以4比1大炒車路士，係兩隊近8次交手首次分出勝負，之前7次碰頭都喺90分鐘打和。論牌面「紅軍」無疑秤高啲，但佢哋早前擊敗賓福特後，再有迪亞高祖達及居迪斯鍾斯受傷，連同蘇保斯拉爾、阿歷山大阿諾特同門將艾利臣比加等原有傷兵，人腳變得緊絀，球員發揮難免有顧忌。

藍戰士對強隊屢有驚喜
車仔爭入聯賽前4機會渺茫，目標自然放喺英聯盃同英足盃身上，早前英足盃透過重賽淘汰阿士東維拉，可見班球員踢盃賽搏晒命。車仔今季演出飄忽，對住強隊往往有驚喜演出，上場聯賽1比1賽和曼城，士氣有所提升，再遇「老對手」利物浦有權頂住唔輸，預計可能又要鬥到加時，甚至射埋12碼分勝負都唔奇。