[东方报]歐協：維拉強陣出擊明恰里[04-11]

十七号

今晚歐協聯8強首回合，阿士東維拉主場迎戰里爾。維拉主帥艾美利經驗豐富，深明主場搶W嘅重要性，可恃質擊退實力一般嘅里爾，主勝有計。（Now 646周五凌晨3時直播）

維拉今季聯賽殺上前列之餘，更喺歐協聯闖入8強，主帥艾美利功不可沒，呢位西班牙教頭曾率領西維爾同維拉利爾贏過歐霸冠軍，亦帶過阿仙奴闖入歐霸決賽，歐洲賽經驗相當豐富。連同附加賽在內，維拉喺今屆10場歐協聯錄7勝2和1負，單計主場更加5戰全勝，包括16強首回合作客悶和阿積士0比0情況下，次回合返主場即豪贈4蛋，可見艾帥採用「主場爭勝、客場保和」嘅策略，加上門將達米安馬天尼斯、射手奧尼屈堅斯上場已傷愈復出，可強陣出擊。

里爾未遇真正考驗
另邊廂，里爾近況確係唔錯，就算單計歐協聯，今屆踢咗10場亦未輸過，但要留意對手只係格拉茨、基卡拉斯域卡、施洛雲之流，不宜高估。何況箭頭約拿芬大衞喺歐協聯入得4粒，有2球仲要係附加賽取得，腳風欠順，今場遇上如狼似虎嘅維拉，先至係真正考驗，但無論實力定經驗，維拉瓣瓣秤先，今場可藉地利搶先機。