[东方报]歐霸：意甲內訌！A米恃質捕雌狼[04-11]

十七号

另一場歐霸盃上演「意甲內訌」，AC米蘭主場迎戰「雌狼」羅馬，論狀態及整體實力，A米勝一籌，各項賽事取得7連勝，今仗更加要把握地利優勢，力爭先下一城，提升晉級機會。反觀羅馬近4場歐霸盃作客未贏過，預料會捱打，加上雙方近7次對賽，A米獲得5勝2和，主勝值博。（Now 645周五凌晨3時直播）

盧卡古陷入球荒
AC米蘭上半季表現失準，導致歐聯分組賽出局，幸好踏入2024年之後，球隊愈戰愈勇，除咗聯賽反超祖雲達斯升上第2位，轉戰歐霸盃亦有出色發揮，踢4場贏3場，包括上圈16強「雙殺」布拉格斯拉維亞，合共轟入7球。事實上，A米貴為上屆歐聯4強分子，「空降」歐霸盃超晒班，加上對賽往績食住羅馬，今仗勝算甚高。

至於羅馬近期表現走下坡，特別係進攻走晒樣，近4場比賽僅入2球，包括聯賽作客弱隊萊切悶和0比0。前鋒盧卡古深陷入球荒，已經成個月冇波入，腳風曳到爆。羅馬上場意甲靠中堅基安盧卡文仙尼建功，先以1比0擊敗同市宿敵拉素，加上近4場歐霸盃作客只有2和2負，今仗造訪聖西路球場，預料會陷入劣勢，AC米蘭主勝抵玩。