[东方报]意盃：阿特蘭大當弗搶意盃[05-15]

十七号

意大利盃決賽，由阿特蘭大與祖雲達斯於羅馬奧林匹高球場爭奪冠軍。阿特蘭大狀態極勇，近7戰6勝1和，相反祖雲達斯6場只得5和1負，球員欠缺爭勝心，教練阿里基亦愈教愈無癮，「阿大」向住意盃同歐霸盃雙冠王目標進發，決心比祖記強，平手盤捧阿特蘭大。（周四凌晨3時開賽）

要數今季歐洲神奇球隊，除咗人所共知嘅德甲王者利華古遜，阿特蘭大表現都令人刮目相看。「阿大」下個周中就會同利華古遜爭歐霸冠軍，但今個禮拜佢哋要先完成手上第一個「To Do List」，就係贏意盃冠軍。

阿特蘭大狀態非常好，近7場獲6勝1和，啱啱過去周日意甲以2比1擊敗羅馬，喺爭奪下屆歐聯入場券佔先機，肯定可以為今仗激勵士氣，而且有一點好重要，「阿大」上次最接近冠軍，就係2021年意盃決賽，當年佢哋就係輸畀祖雲達斯，今場復仇味濃。

祖記頹爆近6戰不勝
祖雲達斯度過一個令人失望嘅球季，喺唔使兼顧歐戰下，聯賽現時只排第4，遠遠落後已奪冠軍嘅國際米蘭25分，阿里基雖然聞到魷魚香，但仍然教到力不從心，近6場未贏過，再推遠啲，近12場亦只係贏得2場，上場聯賽主場鬥包尾嘅沙蘭大坦拿，喺無乜特別輪換下，竟然先落後0比1，要去到補時先追和，今場對住弗到爆嘅阿特蘭大，更加唔好奢望會有突破性反彈表現，平手盤全力支持阿特蘭大啦！