[东方报]奧男足：男奧足4強激爆歐非對決[08-05]

十七号

奧運男子足球4強開戰！今屆巴黎奧運非洲勢力抬頭，兩場4強戲碼同屬「歐洲Vs非洲」，打破之前5屆由拉丁美洲球隊壟斷金牌局面。其中今晚頭場由摩洛哥硬撼金牌熱門西班牙，尾場就輪到東道主法國登場，迎戰神奇球隊埃及。

摩洛哥西班牙喪攻玩大佢
今晚4強大戰由摩洛哥男奧足打頭陣，硬撼西班牙男奧足。摩洛哥今屆遇強愈強，有能力同信心與「小狂牛」合演進攻大戰，2.5球嘅大盤放心捧。（HOY TV 76台周二凌晨零時直播）

摩洛哥男奧足今屆表現突出，高壓緊逼戰術同凌厲反擊愈踢愈順，喺經驗豐富嘅阿舒拉夫、蘇菲安拉希美等超齡國腳帶領下，呢支非洲雄師第一仗就擊敗阿根廷男奧足，8強對美國男奧足更大炒4比0，今屆4場比賽攻入10球，總入球全開3球或以上。

「小狂牛」後防唔算穩陣
西班牙實力唔使懷疑，不過分組賽就輸過畀另一支非洲球隊埃及，佢哋進攻力強，不過防守唔係特別穩陣，8強3比0贏日本，對手曾有入波因些微越位食詐胡，又有頭槌頂中柱，能保住首戰「零封」有唔少幸運成功，既然西班牙男奧足今屆4仗總入球都係全部3球或以上，捧入球大好路。

法國唔齊腳細頂埃及
至於今晚4強尾場，東道主法國男奧足迎戰埃及男奧足。「小高盧雞」秉承大國腳嘅穩中求勝風格，至今仍保持清白之身，防線猶如銅牆鐵壁，今仗人腳不整會先求穩陣，埃及男奧足同樣守得，預計今場會陷於拉鋸，寧捧2.5球入球細。（HOY TV 76台周二凌晨3時直播）

米洛特干尼停賽實力受損
由於今屆法國雖然喺8強淘汰死敵阿根廷，但中場安素米洛特玩嘢走去阿軍後備席慶祝，引發雙方職球員衝突，最終安素米洛特領紅牌被逐，另一中場文奴干尼累積黃牌夠數，兩人今仗齊齊坐波監，實力打折扣。

雖然「小高盧雞」主帥亨利係前鋒出身，但佢似乎有向前隊友、現任法國國家隊領隊迪甘斯偷師，採取務實求穩戰術，今屆表現極之穩定，4戰全勝之餘，至今仲係保持不失。佢哋以控制戰局為主，唔會心急，睇準對手犯錯先作出致命一擊，寧願悶悶哋贏，當中頭兩輪對美國同畿內亞，都係等到下半場先打破僵局，可見一斑。

另邊廂，由前阿仙奴中場艾利尼領銜嘅埃及，同樣係打穩陣波，今屆4場法定時間錄2勝2和，其中3場開2球或以下。查實呢支非洲球隊一向守強於攻，連同上屆在內，近8場男奧足有7次開2球或以下，今遇東道主更加唔敢冒進，入球細係不二之選。