[东方报]意甲：祖記歎私房菜熱Ｗ起筷[08-26]

十七号

今晚意甲尾場維羅納主場迎戰祖雲達斯。祖記喺新帥莫達帶領下，一改前任教頭阿里基嘅悶蛋足球，令人耳目一新，造訪「私房菜」維羅納必定趁熱食，客勝有計。（周二凌晨2時45分開賽）

曾效力巴塞、國米及巴黎聖日耳門嘅莫達，球員時代以用腦踢波見稱，掛靴後教波同樣注重中場傳控，上季帶領博洛尼亞好睇又好食，更取得歐聯入場券，今季轉投祖記，決心改變球隊過往悶蛋風格，除簽入杜格拉斯雷斯及卡夫蘭杜林外，亦企硬棄用費達歷高基艾沙。祖記首輪大炒科木3比0，全場13次射門7次中龍，踢嚟充滿活動朝氣，改革算係初見成效。

維羅納遇真正考驗
維羅納首輪聯賽爆大冷，喺主場豪贈拿玻里3蛋，不過同對手內部立立亂有關，今場先係真正考驗，而且佢哋仲將表現穩定嘅後衞桑卡波爾賣畀今仗對手祖記，實力此消彼長。睇番雙方近5次碰頭，祖記取4勝1和未輸過，明顯格食格，加上莫達新官上任，梗係想繼續贏波立威，整定維羅納冇運行。