[东方报]歐國聯：鬥磨格局克羅地亞細鍊波蘭[09-08]

august

今晚歐國聯A1組，克羅地亞主場迎戰波蘭。克羅地亞首輪1比2輸畀葡萄牙，今場會更為謹慎；波蘭上場3比2險勝蘇格蘭，3分在手亦唔需要急，而且兩隊踢開「老鬼波」，近3次交手全開2球或以下，今場要2.5球入球細啱數。（周一凌晨2時45分開賽）

格仔軍團「百歲鋒線」難靠
「格仔軍團」延續歐國盃頹勢，上場作客葡萄牙，比賽初段就被達洛治同C朗拿度攻陷，及後靠對方達洛治擺烏龍先破到蛋，連同歐國盃已經4場不勝。佢哋最大問題係陣容嚴重老化，38歲隊長莫迪歷仲踢緊，正選前鋒卡拉馬歷亦已經33歲，加上35歲副隊長比列錫冇班落，3個加埋106歲，攻力好極有限。

波蘭今夏歐國盃1和2負僅得1分出局，上場歐國聯對蘇格蘭，總算重回勝軌，但過程相當驚險，領先兩球下被追和，踢到90＋７先由小將薩利域斯基12碼絕殺，36歲隊長羅拔利雲度夫斯基72分鐘被換出，中場施連斯基亦踢唔足，作客好大機會踢守勢波，目標都係攞1分。兩支東歐兵近3次碰頭互有勝負，全開2球或以下，相信今場交鋒都係鬥磨格局，入球唔會多。