[东方报]英超：車路士兵多將廣發到維[12-01]

august

至於同晚另一英超激鬥，車路士主場迎戰阿士東維拉，「藍戰士」已重拾勁旅本色，尤其喺主場發揮奇佳，各項賽事近7次主場出擊，錄得5勝2和。反觀阿士東維拉成績大為退步，作客更加3連敗，恐怕無力阻擋對手全取3分，車路士主勝穩陣。（Now 621及611周日晚9時30分直播）

車路士今季聘請意大利少帥馬利斯卡執教後，球隊整體水準明顯比以往穩定，踢12場聯賽僅2敗，而且只係輸畀2支勁旅曼城同利物浦，遇上其他對手，多數可以佔上風，應贏則贏。皆因「車仔」兵多將廣，板櫈深度充足，踢盃賽多數用副選，令高爾彭馬、尼高拉斯積遜等主力可以養精蓄銳，專注踢好英超，發揮自然有保證。車路士今季首要目標係奪取英超前4位，參加下屆歐聯，現時前4之爭激烈，「藍戰士」肯定搏盡。

維拉人腳有限擋唔住
客隊阿士東維拉情況剛好相反，人腳有限之下，仲要兼顧歐聯戰線，令球員疲於奔命，經過連番惡戰之後，兵力不足問題愈來愈嚴重，導致各項賽事近7場未贏過，只有3和4負，其中近2場英超作客分別以1比4大敗於熱刺腳下，以及吞利物浦2蛋，可見維拉遇強即屈，今仗面對豪門車路士，恐怕凶多吉少。