[东方报]英足盃：富咸鋤強扶弱點讓屈福特[01-09]

十七号

今晚英足盃有場第3圈「倫敦打吡」，富咸主場迎戰屈福特。雖然富咸實力明顯較高，但近期做咗「和平大使」贏唔到波，而且對親屈福特都被食住，「讓球主客和」仲要讓兩球咁多，寧捧屈福特讓球客勝。（Now 651周五凌晨3時45分直播）

講到硬淨，富咸喺英超算係數一數二，單計近8場未輸過，連阿仙奴、利物浦同車路士等勁旅都要失分畀佢哋，唔講得笑。不過要留意，呢8場裏面，富咸只係贏過白禮頓同車仔，其餘6場全部打和，對住修咸頓及葉士域治等弱旅都贏唔到，似乎係遇強愈強、遇弱愈弱。何況富咸最大目標喺聯賽力爭上游，今場英足盃隨時作輪換，唔排除收起魯爾占美尼斯及伊禾比等主力，實力或受影響。

近年交鋒「大黃蜂」佔優
另邊廂，屈福特只係英冠中游分子，近況亦都麻麻，近5場輸咗4場。不過佢哋有樣好，就係專剋富咸。雙方近4次交鋒，「大黃蜂」取得3勝1和未輸過，尤其係英足盃呢類「爆冷溫床」，較強一方如果戰意麻麻，隨時出事，加上「讓球主客和」富咸讓到兩球咁辣，屈福特就算輸1粒都贏盤，咁着數梗係捧讓球客勝。