[东方报]歐冠：國米擺鐵桶力保優細[03-11]

十七号

今晚歐聯16強次回合繼續有「意荷對決」，意甲「1哥」國際米蘭返主場，再鬥荷甲勁旅飛燕諾。國米揸住2球喺手，你急佢唔急，今仗最緊要保住優勢，佢哋今屆歐聯只係失咗1粒咁大把，要守住飛燕諾冇難度，3.5球入球細係明智之選。（Now 639周三凌晨4時直播）

尹佩斯接手飛燕諾連食白果
國米雙箭頭馬古斯杜林同拿達路馬天尼斯攻力強勁，不過「藍黑兵團」最大殺着其實係防守，今屆9場歐聯僅失1粒，係單屆零封率最高紀錄，單計近7仗歐聯6次開2球或以下。如果係計施蒙尼恩沙基執教國米後，38場有23仗保持清白之身，零封率達60.5%，亦係歐聯史上所有執教30場或以上嘅主帥最高比例，可見「細恩」幾好「守勢」，依家領先緊兩粒，今仗當然唔會搶攻咁傻喇。

飛燕諾雖然今屆歐聯屢有驚喜，除咗落後3球下神奇逼和曼城，仲擊敗過拜仁慕尼黑同AC米蘭，但正正係一連串佳績，實力亦告曝光，令國米對佢哋更有戒心。佢哋近期搵嚟教波成績一般嘅名宿尹佩斯執教，上任後頭2仗只得1和1負兼0士哥，成為首位執教飛燕諾頭2場正式賽事食白果嘅教頭，認真肉酸，憑乜嘢攻破國米嘅銅牆鐵壁呢？