[东方报]世盃歐洲：立陶宛頹爆芬蘭趁機搶Ｗ[03-24]

十七号

今晚世盃外歐洲區G組次輪賽事，立陶宛主場鬥芬蘭。立陶宛7連敗曳到冇朋友，反觀芬蘭首輪旗開得勝信心十足，有力乘勝追擊，客勝有計。（周二凌晨1時開賽）

立陶宛自1990年獨立後，從未闖入大賽決賽周，單睇上屆世盃外8場輸足7場。立陶宛喺2023年由贊加斯卡斯接手，呢位前國腳執教20場只得4勝5和11負，早前喺歐國聯C2組就6戰全敗排包尾，日前世盃外首戰臨尾香以0比1不敵波蘭，連輸7場信心跌到新低點，絕對係「冇骨魚腩」。

兩隊士氣此消彼長
另邊廂，芬蘭雖然唔係乜嘢好貨式，但話晒都入過2020年歐國盃決賽周，當年分組賽仲贏過丹麥，可惜未能躋身淘汰賽。佢哋今屆世盃外有哈迪基、費特歷贊臣、迪姆普基同普贊柏路等好手助陣，踢過英超嘅迪姆普基係芬蘭史上士哥王（42球），哈迪基則屬利華古遜上季榮膺雙冠王嘅功臣。芬蘭上場世盃外憑奧特文一箭定江山，作客小勝馬爾他1比0，有助提升士氣，此消彼長下，今仗可反客為主。