[东方报]英超：車仔極速撻着進擊水晶宮[08-17]

十七号

今晚英超頭場之一上演倫敦打吡，車路士主場迎戰水晶宮。車仔雖然較遲開操，但熱身賽頻頻報捷，似乎好餓波，加上近年主場食慣水晶宮，讓球盤讓1球坐走望贏，照撐上盤。（Now 621及611周日晚9時直播）

「車仔」每次由意籍領隊執教例行運，「光頭佬」馬利斯卡上季接手，便領軍重返前4兼勇奪歐協聯，跟住再喺世冠盃決賽爆冷擊敗巴黎聖日耳門封王。

近8次主場對賽贏7次
由於世冠盃打到7月中，「車仔」經過短暫休息，8月頭就要開操備戰新球季，當大家擔心佢哋未抖夠之際，即喺熱身賽連贏利華古遜同AC米蘭，新加盟嘅祖奧柏度同利安戴納延續世冠盃佳態，頻有士哥證明可即插即用，況且「車仔」近8次喺史丹福橋球場迎戰水晶宮贏咗7次，可挾地利打響頭炮。

另邊廂，水晶宮連贏英足盃同社區盾，講狀態絕對唔輸蝕，可惜內部問題多多，佢哋因違反「多重球會擁有條例」，要「降級」踢歐協聯，導致收入大減，球隊講到明會賣走剩番1年合約嘅隊長馬克古希，另外伊比爾治伊斯亦受到熱刺同阿仙奴垂青，難免影響軍心，造訪「車仔」凶多吉少。