[东方报]英超：富咸增兵失敗主帥嬲 曼聯擦出火花捧上[08-24]

十七号

今晚英超壓軸戰，由富咸主場硬撼曼聯。富咸今夏冇乜增兵，主帥馬高施華發晒脾氣都冇計，「紅魔」雙攻中麥比奧莫同馬菲奧斯根夏，上仗已展現出佢哋嘅魔力，就算新箭頭班捷文施斯高未必擔正，亦足以摧毀富咸防線，讓球盤曼聯讓平半，上盤捧得過。（Now 621及611周日晚11時30分直播）

英超消費力一向冠絕全歐洲，不過總有啲球隊係例外，富咸就係呢種「異類」，今夏傳買人傳得多，淨係講前鋒，出名啲有海倫同李察利臣，冇咁出名有泰尼米，但全部只聞樓梯響。搞到主帥馬高施華忍無可忍，近日鬧爆球隊今夏轉會計劃非常失敗：「呢個係我哋嘅錯，唔係市場嘅錯，後防同中場都需要補強，但我唔確定做唔做到。」睇得出馬高施華灰到爆，難怪上仗補時逼和白禮頓，佢都話堅好彩，反映球隊急需買人。

麥比奧莫根夏展現侵略性
另邊廂，曼聯雖然上仗輸畀阿仙奴，但只因門將比恩迪亞犯錯所致，佢哋全場撳住嚟攻，尤其係能邊能中嘅攻中麥比奧莫同馬菲奧斯根夏，極具侵略性，令「兵工廠」防線風聲鶴唳，主帥魯賓艾摩廉大讚球隊更多衝刺同更勇敢，冇再踢悶波。艾摩廉賽前未有透露新箭頭班捷文施斯高會否擔正，不過上仗打正選嘅美臣蒙特成功銜接中前場，表現出色。最重要係曼聯專剋富咸，雙方近6次聯賽碰頭，「紅魔」贏咗5次，明顯格食格，今仗再食唔奇。