[东方报]意盃：8強焦點戰 國米遇弱半W冇甩拖[02-04]

十七号

今晚意盃8強焦點戰，國際米蘭於中立場硬撼拖連奴。國米今季遇強即屈，不過遇弱絕不腳軟，加上近年對拖連奴例必由頭贏到落尾，今仗一定先發制人，半場主勝好路。（周四凌晨4時開賽）

雖然國米於冬窗冇乜增兵，但一向聽話嘅主帥捷禾亦冇投訴，睇吓手頭上有幾多材料盡做，畢竟陣中仍有安迪迪奧夫、彼達蘇錫、恩比斯錫等副選，鋒線亦打起咗2名後生仔比奧艾斯保薛圖同安治邦尼，要輪換都有人。儘管國米今季對親強隊戰績奇差，令捷禾備受批評，不過依家喺聯賽仍位居榜首，亦反映出佢哋對住實力較弱球隊，基本上實食冇黐牙。

拖連奴對賽由頭輸到尾
另邊廂，拖連奴近期狀態低迷，後防不穩幾乎場場有失波，各項賽事近5仗3度落敗，而呢3次輸波均半場已經落後，難怪喺聯賽徘徊中下游，加上對住強隊都腳仔軟，不宜高估。翻查紀錄，雙方之前3次碰頭，「藍黑兵團」全部贏晒，包括今季首循環大勝5比0，而呢3次均於上半場已取得領先優勢，始終國米兵源唔算好充裕，相信捷禾都想速戰速決，早早鎖定勝局，下半場可以hea住踢，半場主勝捧得過。