[东方报]歐協：羅馬搶韁吼第一隊入波[04-28]

august

今晚同時上演兩場歐協聯4強首回合，其中奪冠熱門李斯特城，先於主場迎擊羅馬。李城近況麻麻，撞正由摩連奴領軍嘅羅馬都幾惡啃，況且羅馬踢歐協聯分外搶韁常先入波，不妨揀佢哋「第一隊入球」。

李城主帥羅渣士於2006至2008年執教車路士青年軍，跟過摩連奴搵食，不過佢嘅傳控打法同「寸王」防守至上嘅戰術南轅北轍，好難叫佢哋做師徒。李城近期狀態一般，近7仗贏得兩場咁大把，老將占美華迪啱啱先復出，明顯未上力。羅馬嘅「譚仔」譚美阿巴謙、羅倫素柏歷堅尼等球員反擊速度高，往往能先拔頭籌，「雌狼」近6場歐協聯有5次先開紀錄，面對態沉嘅李城有力先入波。

飛燕諾馬賽大駁火
另一場4強首回合，荷甲勁旅飛燕諾主場強攻馬賽，飛燕諾今屆歐協聯未逢敗仗，9仗狂入25粒盡展強大火力，全開3球或以上，前鋒迪沙斯更以8個入波同譚美阿巴謙並列歐協聯射手榜榜首，不過馬賽亦有皮耶及米利克等攻擊好手，佢哋由歐霸降格踢歐協聯後6戰全勝轟13粒，有力駁火，2.5球入球大值得捧場。