[东方报]歐霸：4強階段穩陣至上 韋斯咸法福細均力敵[04-28]

august

今晚歐霸盃4強首回合重頭戲，必屬「英德大戰」，由英超「錘仔幫」韋斯咸主場對法蘭克福。韋斯咸今屆出戰歐霸盃踢法保守，貫徹領隊莫耶斯一向穩打穩紮嘅戰術，尤其首回合更加會小心翼翼。至於德甲球隊法蘭克福近8場比賽僅一勝，作客唔會急於冒進，捧中位數2.5球嘅入球細好過。

法蘭克福近況麻麻
韋斯咸喺莫耶斯執教下，表現四平八穩，上場英超作客勁旅車路士，踢到最後一分鐘先至失守，僅負0比1已經有交代。但惡鬥過後亦令韋斯咸球員消耗大量體力，匆匆再戰歐霸盃，難免比較輸蝕，預料會睇定嚟踢，避免後勁不繼，而且射手米查利安東尼奧自3月頭英足盃入波後再未有進帳，腳風欠順，就算主場出擊亦唔敢輕舉妄動。

另一邊廂，法蘭克福上圈淘汰巴塞隆拿，演出神勇，但查實其餘比賽表現只屬一般，近6場歐霸盃僅2勝，聯賽更加5場不勝，今仗遠赴英格蘭應會尋求不敗，等次回合返主場再砌過。翻查紀錄，「錘仔幫」今屆歐霸5場主場賽事，法定時間內有4場總入球開2球或以下，嚟到4強大家都鬥穩陣，入球細捧得過。