[东方报]意甲：近4聯賽贏3場 費倫客W手到拿萊[04-20]

十七号

今輪意甲壓軸之戰，萊切主場對費倫天拿，護級分子萊切一蹶不振，近7場聯賽輸6場，包括近4場全敗，陷入信心危機，恐怕無力翻身。費倫天拿剛於歐協聯出局，但整體狀態尚算不俗，單計近4場意甲取得3勝1和，今場有望全取3分，客勝回報高值博。（Now 638周二凌晨2時45分直播）

萊切4連敗僅入1球
意甲護級形勢上，排最後兩位嘅比薩SC、維羅納好大機會一齊降班，剩番一個降班席位，不外乎係萊切、克雷莫納其中之一。雖然萊切急需要搶分，無奈礙於實力有限，顯得有心無力，計埋上場吞博洛尼亞兩蛋，已經聯賽4連敗僅入1球，今季踢32場聯賽只有21球進帳，屬於各隊之中最少，攻力極之疲弱，要攻入由著名門將迪基亞把守嘅費倫天拿大門，並唔容易。

費倫天拿上周中歐協聯8強次回合喺主場以2比1擊敗水晶宮，可惜兩回合合計仍然輸2比4出局，表現已經有交代。事實上，費倫天拿季尾走勢凌厲，近4場聯賽取得3勝1和，包括打和榜首國際米蘭1比1，絕對唔嘢小，要贏萊切綽綽有餘。雖然前鋒摩斯堅恩有傷在身，上陣成疑，但仲有羅拔圖碧高尼、艾拔古蒙臣、尼高路法基奧利、尼度亞等進攻好手，有力反客為主，全取3分而回。